Post Details

MAJAJI WAPYA WA MAHAKAMA YA RUFAA WAPATIWA MAFUNZO ELEKEZI KWA MARA YA KWANZA

Published By:Mary C. Gwera

Jaji Mkuu wa Tanzania, Mhe. Prof. Ibrahim Hamis Juma amefungua rasmi Mafunzo elekezi ya kwanza kufanyika kwa Wahe. Majaji wapya wa Mahakama ya Rufani walioteuliwa na kuapishwa na Rais wa Jamhuri ya Muungano wa Tanzania Mhe. Dkt. John Pombe Magufuli hivi karibuni.

Akizungumza wakati wa ufunguzi wa mafunzo elekezi ya wiki moja kwa Wahe. Majaji hao, Machi 11,mwaka huu Mhe. Jaji Mkuu alisema kuwa, mafunzo endelevu kwa Majaji yana umuhimu wa kipekee na ni moja ya kigezo cha msingi katika kuboresha utoaji wa haki.

Akinukuu maneno ya Marehemu Jaji J.K Mathur aliyehudumu katika Mahakama Kuu ya Huko Calcutta chini India katika andiko lake lenye kichwa cha habari kisemacho “Judicial Training: Some Inceptive Considerations,” Mhe. Jaji Prof. Juma alisema kuwa, andiko hilo huwakumbusha mambo makuu matatu katika mafunzo ya Maafisa wa Mahakama nayo ni Maarifa, Ujuzi na Mtazamo.

“Mambo hayo yanatakiwa kuzingatiwa katika utendaji kazi wa Majaji na Majaji wa Mahakama ya Rufani,” alieleza Mhe. Jaji Mkuu.

Akinukuu maneno ya Jaji Mstaafu wa Mahakama ya Rufani aliye hudumu katika Mahakama ya Rufaa ya Albert mwenye uzoefu wa takribani miaka 27 katika Mahakama tatu tofauti nchini Canada Mhe. J.E. Cote alisema kuwa “Jaji Mbaya si yule asiyefahamu Sheria bali  ni yule asiye mdadisi wa mambo. Jaji wa mahakama ya Rufaa hapaswi kuwa mdadisi pekee bali anapaswa pia kufahamu namna ya kupitia kesi mbalimbali.”

Mkuu wa Chuo na Mratibu wa Mafunzo hayo Mhe. Jaji. Dkt Paul F. Kihwelo akitoa maelezo ya utangulizi alisema kuwa, kama Chuo wamefarijika kuona kuwa Majaji hao walioteuliwa na kuapishwa kuwa Majaji wa Mahakama ya Rufaa, sita kati yao waliwahi kupata mafunzo elekezi hapa Chuoni miaka kadhaa iliyopita.

Aliongeza  jambo la kufurahisha zaidi ni kwamba aliyekuwa Mkuu wa Chuo ambaye pia wakati huo alikuwa ndiye Mratibu wa Mafunzo hayo Mhe. Jaji Fredinand Wambali ni miongoni mwa washiriki wa mafunzo haya elekezi kama Jaji wa Mahakama ya Rufaa.

Kwa upande wake Mkurugenzi wa Mafunzo hayo Mhe. Jaji Mstaafu Harold Nsekela, akitoa neno la ukaribisho kwa washiriki aliiasa Mahakama kuendelea kuendesha  mafunzo elekezi na endelevu ya Kimahakama kwa Majaji kama fursa ya kuendesha mijadala na kujiimarisha zaidi katika taaluma ya Sheria, ubadilishanaji wa uzoefu na kuboresha ufahamu kuhusu elimu ya sheria nchini.

 Naye Mwenyekiti wa Baraza la Uongozi wa Chuo Mhe. Jaji Dkt. Gerald Ndika akitoa neno la shukrani kwa hadhara hiyo, Mhe. Jaji Ndika alimshukuru Jaji Mkuu kwa busara zake na kukiamini Chuo cha Uongozi wa Mahakama Lushoto kuwa kina uwezo wa kuandaa, kufanya na kutoa mafunzo yenye ubora unahitajika kwa Majaji wa Mahakama ya Rufaa nchini. “Sina shaka kwamba hotuba hiyo imetutia hamasa na imetuweka katika hatu   nzuri ya kuandaa na kuendesha mafunzo elekezi”Pia aliishukuru zaidi Menejimenti ya Chuo kwa kufikiria kwa mapana zaidi “out of the box” kwa kuandaa programu ya siku tatu kwa Madereva kumi na watano waliombatana na Majaji wa Mahakama ya Rufaa. Programu hii kwa upande mwingine ubunifu wa shughuli zitakazoweza kuisaidia Mahakama kutumia vyema rasilimali watu na rasilimali fedha zinazotengwa kwa Mafunzo elekezi 

Ikumbukwe kuwa Mafunzo haya elekezi kwa Majaji wa Mahakama ya Rufaa yanafanyika kwa mara ya kwanza na Mahakama ya Tanzania kwa kushirikiana na Chuo cha Uongozi wa Mahakama Lushoto. Sambamba na Jaji Mkuu kuwa Mgeni rasmi wa ufunguzi wa Mafunzo hayo vilevile alikuwa ni miongoni mwa wawezeshaji wa mafunzo hayo.

Chuo cha Uongozi wa Mahakama Lushoto kinawatakia kila lakheri Majaji hawa wanapoanza safari hii ya kihistoria ya kazi yako kama Majaji wa mahakama ya Rufaa. Nchi inatarajia utendaji kazi wa mfano wa kuigwa kutoka kwao.

Comments (0)

Leave a Comment