Post Details

MAHAKAMA KUU YAENDESHA KIKAO CHA KUSUKUMA MASHAURI YA JINAI

Published By:Mary C. Gwera

Kamati ya Taifa ya Mahakama Kuu ya Tanzania ya kusukuma mashauri ya Jinai imefanya kikao chake cha kupitia maendeleo ya kesi za jinai ambazo hazijakamilika kusikilizwa ndani ya siku 60 na zaidi, ili kutambua sababu za ucheleweshwaji na kuchukua hatua stahiki za kiutawala kuharakisha usikilizwaji wa mashauri hayo.

Akifungua rasmi kikao hicho mapema Aprili 03, 2020 kilichofanyika katika Kituo cha Mafunzo na Habari kilichopo Mahakama ya Hakimu Mkazi Kisutu,Jaji wa Mahakama Kuu ya Tanzania, Mhe. Dkt. Bennhaji Masoud aliwataka wadau wote wa Haki Jinai kutambua mchango wao wa moja kwa moja kupunguza msongamano na kuweka mazingira wezeshi ya utoaji haki.

Aidha; Mhe. Jaji Dkt. Benhajj aliwataka pia Wadau wa kikao hicho kuendelea na wajibu wa utoaji haki kwa wote na kwa wakati licha ya changamoto ya ugonjwa wa corona.

“Ugonjwa huu ni changamoto ambayo hatuna budi kuikabili kwa kutumia njia mbadala za usikilizwaji wa mashauri mahakamani ili kuondosha mlundikano wa mashauri na msongamano usio wa lazima,” alisema Mhe. Jaji Benhajj.

Mhe. Jaji huyo aliwataka Wajumbe wa kikao hicho kushughulikia changamoto zilizopo kwa ngazi ya kitaifa na kuwataka wadau wa Haki Jinai kutoa ushirikiano wa dhati kufanikisha azma ya kupunguza mlundikano wa mashauri mahakamani hasa kwa ngazi ya mikoa na wilaya.

“Matumizi ya tehama kwa Mahakama na wadau hayakwepeki hasa katika kipindi hiki cha mlipuko wa virusi vya corona vinavyosambaa kwenye mazingira ya msongamano kuna haja ya mahakama na wadau wake kuongeza jitihada ambazo zilishawekwa kupitia kanuni za kusajili mashauri kwa njia ya mtandao ‘E – Filing System’ kupitia Gazeti la Serikali toleo na 148 la mwaka 2018,” alieleza.

Aliongeza kuwa, Mahakama haiwezi kutimiza jukumu lake peke yake bila kuwepo na ushirikiano wa wadau wa haki jinai katika kutoa ushauri na mwelekeo wa maagizo mbalimbali ya ngazi za juu, changamoto kwa mahakama na hususani kwa kamati hii ili kutafakari na kushauri namna bora ya kusukuma mashauri na kupunguza mlundikano.

Nae, Msajili wa Mahakama Kuu ya Tanzania, Mhe. Sharmilla Sarwatt alisema lengo la kikao kazi cha kusukuma mashauri ni kujadili namna ya kuendesha na kupunguza mlundikano wa mashauri mahakamani hasa katika kipindi hiki cha mlipuko wa ugonjwa wa virusi vya corona.

Mhe. Sarwatt alizitaja mbinu za kupunguza mashauri Mahakamani ikiwa ni pamoja na kuendesha mashauri ya jinai kwa njia ya mtandao, utaratibu wa kupanga muda wa kusikiliza kesi ili kuondoa msongamano usio wa lazima mahakamani na pia kusajili kesi mahakamani pindi upelelezi unapo kuwa umekamilika”.

Akizungumzia umuhimu wa kikao hicho, Mkurugenzi Msaidizi Upelelezi Makosa ya Jinai nchini, Bw. Charles Kenyela aliipongeza Mahakama ya Tanzania kwa kushirikisha wadau wa haki jinai ili kutatua changamoto na kutafuta namna bora ya uendeshaji wa mashauri hasa katika kipindi hiki cha mlipuko wa  virusi vya corona.

Kamati ya kitaifa ya kusukuma kesi inaundwa na wadau mbalimbali wa haki jinai ikiongozwa na Mahakama Kuu ya Tanzania, Ofisi ya Mwanasheria Mkuu wa Serikali, Ofisi ya Mkurugenzi wa Makosa ya Jinai, Takukuru, Magereza, Uhamiaji, Chama cha Mawakili Tanganyika, Idara ya ustawi wa jamii na wengineo.

Comments (0)

Leave a Comment